ع الخدمة قالوا

هل تخدم في اجتماع، مجال الترنيم، الدراما، الميديا، ...؟ أم تبحث عن خدمة لك..؟ هل تريد ترك خدمة ما، او تطوير خدمتك الحالية؟. أدعوك اولاً لقراءة هذه الابيات عن الخدمة، ربما تساعدك.

ع الخدمة قالوا

ع الخدمة قالوا الفخامة...,قيمه....,مــركز ... , واحتـرام

وكتير ما قالوا ع الخدمة لبَاقة , وكام زيارة و فريق تمـام

أخويا قالي :الخدمة نشاط. وصاحبي قال: صلوه وهيام

احتار دليلي ... رحت لسيدي… طلبت منه فهم وعلام

رد وقال

يا ابني .. لو خدمة تبني يبقى الأساس خَــدَام

و الخادم من يشارك بحب خيره، ويدي غيره فوق الميزان

قليل ما ياخد، كتير ما يدي، حاسب ما عنده ملك الأنام

يمد أيده لعـون صديقه ويـدي الغـريب أكتر كمـــــان

دى الخدمة مش بلاغة في الخطابة مش لباقة وكُتر الكلام.

الخدمة انك تقوم تبشر ، بصلب ربك بعد الآلام

بحب و بسـاطة دايما تنادى برب يغفر كــــل الآثام

تبقى الشهادة اسلوب حياتك بالعمل مش بالعلام

والخادم

يـقــرا ويتعـلم ، يـسمع ويستفهم , يـكبر مـــع الأيام

صـاحي لنفسه ، صاحي لروحه, عقله بيكبر ويا الإيمان

يصحى تملي في الفجر بدري، يروح لسيده ويفتح كلام

يحكى معاه كل المشاعر, كل المخـــاوف وحلـم الزمان

وفى كلمة الله يلهج و ياكل , يشبع ويلقى عزا وسلوان .

سألني سيدى :تعرف مواهبك ...؟؟؟؟

ادرس وفكـــــر.. أزاي تتـاجـر فيهــا بنظـــام

تقدر تقـدم بيها الرسالـة , تقدر تنور بيها الظلام

كانت عظيمة ..., كانت بسيطة..., بالرب ليها تأثير عظـام

لازم تطــور فيها وتكسب للــرب بيها نفـــوس كمــــان .

وبعد الكلام نظر لي سيدي ، وبحب قام وقال السلام .

بصيت لقتني , قاعد لوحدي ، لا حد جاني ولا حد قام

أقرا في حياة مسيحي عشاني ختار لنفسه صورة خَدَام

والان

ما العمل الجديد، او الطريقة المختلفة التي التي يريدك الله أن تتبعها لتصبح اكثر شبها بالمسيح؟

فكر في كيف خدم المسيح؟ ماذا قدم؟ وكيف عاش اثناء خدمته ؟ واخرج بعمل واحد اليوم لتصبح أكثرا شبها به.

كتب/ بيتر عوض - 2002